“No Double Standard” иргэдийн хөдөлгөөнөөс ОХУ-аас дүрвэсэн иргэдэд туслахыг уриалан өнөөдөр /2022.03.29/ хэвлэлийн бага хурал хийлээ. Тэд Монгол туургатанд туслах үндэсний хөдөлгөөн өрнүүлэхээр санаачилж байгаа аж.
Тус хөдөлгөөнд (Буриад, Халимаг, Тува, Алтай) иргэд, “Монгол туургатан төв холбоо”, “Урбан иргэдийн форум” болон иргэний нийгмийн, сайн дурын байгууллагууд оролцох юм байна. Дээрх хөдөлгөөн нь ОХУ-д үүссэн нөхцөл байдлаас үүдэж дүрвэж буй иргэдийн хүлээн авах, туслах үйл ажиллагаа хэрэгжүүлэх зорилготой гэнэ.
Энэ тухай “No Double Standard” иргэдийн хөдөлгөөний төлөөлөгчид “Монгол Улсын Засгийн Газар бие даасан улсын хувьд энэ асуудалд анхаарал хандуулж хүмүүнлэгийн тусламж үзүүлнэ гэж найдаж яаралтай авч хэрэгжүүлэх таван санал зөвлөмжийг Засгийн Газарт хүргүүлж байна.
- Монгол Улсыг зорьж буй Монгол үндэс, угсаатай иргэдэд тулгамдаад байгаа цаг үеийн нөхцөл байдлыг харгалзан үзэж визтэй холбоотой журам, хууль тогтоомжид нэмэлт өөрчлөлт оруулж Монгол туургатан иргэд суралцах, ажиллах, амьдрах мөн манай улсаар дамжин өнгөрөх боломжийг бүрдүүлэх ажлыг зохион байгуулах,
- Монголд байгаа НҮБ-ын төлөөлөл Олон улсын байгууллагатай хамтран эдгээр иргэдийг асуудлыг шийдвэрлэхэд чиглэсэн ажлуудад чармайлт гаргаж, Төрөөс шаардлагатай шийдвэрүүдийг гаргах,
- Монгол Улсын хойд хилд үүсэж болзошгүй ачааллыг таамаглаж арга хэмжээ авч хилээр орж ирж байгаа хүмүүст анхан шатны тусламжууд үзүүлэх төлөвлөгөөг гаргах, өөрөөр хэлбэл хилээр орж ирж буй иргэдэд тус цэгээс эхэлж шат дараалалтай тусламж үзүүлэх,
- Монгол Улсын нутаг дэвсгэрээс дайны дайчилгаанаас дүрвэж ирсэн иргэдийг албадан гаргахгүй байх,
- Үүссэн нөхцөл байдалтай холбогдуулан холбогдох Яамдаас ажлын хэсэг томилох гэсэн саналыг хүргэж байна” гэв.
Эх сурвалж: udur.mn